Буюк Британиянинг The Sun нашри уэльслик футболчи Гарет Бэйлнинг «Реал» билан янги шартномага кўра маошини дақиқасигача ҳисоблаб чиқди, деб хабар бермоқда «iSport.ua».
Аввалроқ Гарет Бэйл «Қироллик клуби» билан келишувини 2022 йилнинг 30 июнига қадар узайтгани ҳақида хабар берилганди.
Хабарда қайд этилишича, уэльслик ярим ҳимоячи 5 ярим йил давомида 190 млн фунт стерлинг ишлаб олади. Унинг ҳафталик маоши 700 минг фунтни ташкил қилади. Аммо солиқлар тўловидан сўнг маош 360 минг фунт стерлингга тенг бўлади.
Янги шартномага кўра, Бэйл мадридликлар етакчиси Криштиану Роналдудан кўпроқ маош оладиган бўлади. Португалиялик 31 ёшли ҳужумчининг ҳафталик маоши солиқлар тўловидан сўнг 300 минг фунт стерлингни ташкил қилади.
Иқтидорли ярим ҳимоячининг ҳафталик маоши 750 минг фунт стерлинг бўлганида, у йилига 36 миллион, ойига 3 миллион, кунига 107 минг, соатига 4 464, дақиқасига 74, сониясига эса 1,23 фунт стерлинг олади.
Гарет Бэйлнинг «Реал» билан шартномасининг узайтирилиши бугун, 31 октябрь куни бўлиб ўтадиган матбуот анжуманида расман эълон қилинади.
