Кеча Ўзбекистонга қарши майдонга тушадиган футболчилар рўйхатини эълон қилган Жанубий Корея терма жамоаси бош мураббийи Ули Штилике яна танқидлар остида қолмоқда.

Хусусан, 8 ойлик танаффусдан кейин яна таркибга чақирилган “Улсан” ҳужумчиси Ли Жонг Хёб масаласида корейс ОАВлари эътирозларини билдирмоқда. Мамлакатнинг етакчи нашрларидан ҳисобланган “Sport News” шундай ёзмоқда:

“Ноябрь ҳам келди. Ҳаво совуқлиги билан ҳамоҳанг тарзда Ули Штилике тақдирида ҳам совуқлик ҳукмронлик қиляпти. У ҳозир муз устида қадам босаётган одам ҳолатида: йиқилишга ҳаққи йўқ. Штиликени “Годтилике”, деб улуғлаш анчайин эскирган иборага айланди. Ўз тақдири ҳал бўладиган Ўзбекистонга қарши ўйинга Кей-лигада 18та гол киритган ҳолда тўпурарлар рўйхатини бошқараётган Чонг Чо Кук (“Гвангжу”)ни эмас, Кей-лиганинг бу мавсумида 29 ўйинда атиги 4 та гол киритган Ли Жонг Хёбни жалб этганлиги тушунарсиз. Ҳеч бўлмаса бу мавсум Кей-лигада 12та голга муаллифлик қилган “Поханг Стилерс” ҳужумчиси Янг Донг Хён ҳам Ули Штиликенинг назаридан четда қолди. Нима бўлганда ҳам 15 ноябрь куни ҳамма нарса ҳал бўлади”.

Корейс ОАВлари маълумотлари асосида Отабек Йўлдошев тайёрлади.