Боливия футбол федерацияси ЖЧ-2018 саралашидан ўрин олган Перу ва Чили терма жамоаларига қарши ўйинларда техник мағлубият билан жазоланди, деб хабар бермоқда ФИФА.

Гап шундаки, бу ўйинларда Боливия терма жамоаси таркибида 33 ёшли ҳимоячи Нелсон Кабрера майдонга тушган. Ваҳоланки, футболчи олдин Парагвай терма жамоасида тўп сурган ва Боливия сафида ўйнаш ҳуқуқига эга бўлмаган.

Сентябрь ойида ўтказилган ва Кабрера майдонга тушган ўйинларда Боливия Перуни (1:0) мағлуб этиб, Чили (0:0) билан дуранг ўйнаган. Энди ҳар иккала ўйинда ҳам Боливияга 0:3 ҳисобида техник мағлубият ёзилди. Бундан ташқари, Боливия футбол федерацияси 12 минг Швейцария франки миқдорида жаримага тортилди.