Эртага, 5 ноябрь куни «Бавария» Германия чемпионатининг 10-тури доирасида «Хоффенхайм»га қарши баҳсда махсус формада майдонга тушади.

Adidas компанияси бугун Мюнхенда тақдимотини ўтказган форма Мальдив ороллари қирғоқларида йиғилиб қолган турли буюмлардан иборат океан чиқиндиларини қайта ишлаш орқали яратилган.

Ушбу форма ортиқча безак, ёзув ва чизиқлардан холи бўлиб, унинг ёқасида «For the oceans» ёзуви битилган. Клуб логотипи ва Adidas'нинг учта чизиғи экологик жиҳатдан хавфсиз равишда туширилган.

«Бавария»нинг бош ҳомийси Telekom ушбу форманинг дизайнини маъқуллади ва ўз номи ёзувини унчалик ёрқин бўлмаган рангда ёзилишига розилик берди. Германия футбол лигаси ва жамоанинг яна бир ҳамкори Hermes ҳам акцияни қўллаб-қувватлади ҳамда ўз логотипининг хира рангда бўлишига қаршилик қилмади.

«Мен Испания соҳилларида катта бўлганман. Шу боис, океан чиқиндиларини қайта ишлаш орқали яратилган формани кийишдан бағоятда хурсанд бўламан. Бу дунё океанларини қандай қилиб ҳимоя қилиш мумкинлигини кўрсатиб қўйиш учун ажойиб имконият», — деди Хаби Алонсо форманинг тақдимот маросимида.