Англия Премьер-лигасининг 11-тури доирасида "Манчестер Юнайтед" бугун сафарда "Суонси"га қарши баҳс олиб боради. Бу ўйинда манкунианликлар бош мураббийи майдонга туша олмайди.

Боиси, Моуриньо Англия футбол ассоциацияси томонидан икки ҳолат бўйича айбдор деб топилган ва битта ўйинга дисквалификация қилинган.

Биринчидан, мураббий «Ливерпуль» (0:0) клубига қарши ўйиндан олдин, бош ҳакам Энтони Тэйлорнинг бу учрашувга тайинланиши ҳақидаги қарорни нотўғри деб айтган. Тэйлор Манчестер шаҳри яқинида яшагани боис, бу ҳолат унга босим ўтказиши мумкинлиги ҳақида гапирган.

Иккинчидан, «Бёрнли» (0:0) клубига қарши ўйинда мураббий бош ҳакам Марк Клаттенбургнинг қарорларига кескин эътироз билдирган, натижада майдондан четлатилган.

Ушбу икки ҳолат юзасидан FA Жозе Моуриньони 1 ўйинга дисквалификация қилди ва 50 минг фунт миқдорида жаримага тортди.

Шу сабабли «Суонси» клубига қарши ўйинда Моуриньо «Манчестер Юнайтед» захира ўриндиғида ўтира олмайди. Ушбу ҳолатни карикатурачи-рассомимиз Жавлон Назаров қуйидагича тасвирлади.