«Барселона» билан шартномаси 2018 йилнинг ёзида ўз якунига етадиган аргентиналик футболчи Лионель Месси янги битим имзолаш арафасида турибди.

Marca нашри маълумотига кўра, Месси йилига 50 миллион евро маош тўлашларини истайди, деб ёзди «ТАСС».

Каталония клуби футболчига рекорд даражадаги маош таклиф қилишга тайёр. Қайд этиш керак, «Барселона» яқиндагина Неймар билан шартномани 2021 йилнинг ёзига қадар узайтирган бўлиб, бразилиялик ҳужумчи учун йилига 25 миллион евро тўлашга рози бўлганди. Айни вақтда жамоа уругвайлик Луис Суаресни ҳам янги шартномага кўндириш ҳаракатига тушиб қолган.

Маълумот учун, шу ҳафта «Реал» Криштиану Роналду билан 2021 йил ёзига қадар шартнома имзолаб, унинг маошини йилига 50 миллион еврога кўтариб берганди. «Барселона» ва Месси ўзаро келишувга эришса, бу икки футболчининг ўз клубидан топадиган даромади бир хил кўринишга келади.