Ҳиндистоннинг «Ченнай» клуби бош мураббийи Марко Матераццини «Керала Бластерс» жамоаси мухлислари ўзига хос услубда кутиб олишларини маълум қилишди.
Гап шундаки, «Ченнай» клуби Ҳиндистон чемпионатининг навбатдаги турида «Керала Бластерс» меҳмони бўлади. Бу жамоаларнинг олдинги ўйинида икки футболчи жанжаллашиб қолган, уларга Матерацци ҳам қўшилган ва натижада дисквалификация қилинган эди.
Энди маҳаллий мухлислар Матерацци ва жамоаси қалбига қўрқув солиш учун Зидан маскаларини тақиб ўйинга тушишни режалаштиришмоқда.
«Биз майдондаги зўравонликка қарши тинч намойиш уюштирамиз ва буни ўзига хос тарзда амалга оширамиз. Мураббий жанжалларда иштирок этмаслиги лозим» - деди Бластерс фанатлари етакчиси Абдул Ҳодий.
Эслатиб ўтамиз, ЖЧ-2006 финалида Зидан Матераццининг кўкрагига калла қўйиб, уни ерга йиқитган эди.
