2016 йилнинг 1 декабрь куни Абу Даби шаҳрида ОФК томонидан йилнинг энг яхшиларини тақдирлаш маросими ўтказилади.
Унда Эрон футбол федерацияси (ЭФФ) вакиллари иштирок этмайди. Бу ҳақда ЭФФ раҳбари Маҳдий Тож ОФК раҳбари шайх Салмон бин Иброҳим ал-Халифа номига хат жўнатган.
«Биз бу тадбирда иштирок этмаймиз. Чунки эронликлардан ҳеч кимнинг номзоди йилнинг энг яхшилари номинацияларида қўйилмаган.
Эрон футзалчилари ЖЧ-2016да бронза медални қўлга киритишди. Ахмад Исмоилпур эса мусобақанинг «Бронза тўп» совринига эга бўлди.
Эроннинг U16 ва U19 жамоалари ЖЧ йўлланмасига эга бўлди. Шунингдек, пляж футболи бўйича Қитъалараро кубогида Эрон 2-ўринни қўлга киритди. Бундан ташқари, Рио-2016 олимпиадаси финалида эронлик ҳакамлар иш олиб боришди.
Эрон терма жамоаси ЖЧ-2018 саралашида гуруҳда пешқадам бўлиб турибди. ФИФА рейтингида эса терма жамоа 27-ўринга кўтарилди, Осиёда эса 1-ўринга чиқиб олди.
Эрон футбол федерацияси бу ютуқларга кўз юммайди» - деб ёзилган хат матнида.
