«Барселона» директорлар кенгаши ҳужумчи Лионель Месси билан шартномани узайтиришга қатъий қарор қилган.

Сўнгги йиғилишда раҳбарият шартномани узайтиришни асосий мақсад қилиб белгилади. «Барселона» президенти Жозеп Бартомеу эса бу борада Мессининг отаси Хорхе билан телефонда суҳбатлашиб олди.

Хорхе Месси 3 декабрь куни ўтказиладиган «Реал» клубига қарши ўйинни томоша қилиш учун ташриф буюради. Шундан сўнг томонлар музокара столига ўтиришади.

Каталония клуби Мессига фаолиятини шу ерда якунлаш имкониятини берадиган узоқ муддатли шартнома таклиф қилади. Бу борада қанча маблағ керак бўлса, шунча ажратилади.

Бартомеу музокара пайтида «Барселона» клубининг ривожланиш йўли ва Мессини бу борада тутган ўрни ҳақида тушунтириш беради.

Sport.es хабарига кўра, ҳар иккала томон шартномани узайтиришга ижобий ёндашмоқда, бироқ Месси ҳали якуний қарорга келгани йўқ. Футболчи аввалроқ, қадрдон «Ньюлэз Олд Бойз» клубида фаолиятини якунламоқчи экани ҳақида гапирган эди.