Мутлақ жангчилик чемпионати (UFC)нинг енгил вазндаги чемпиони ирландиялик Конор Макгрегор АҚШнинг Калифорния штатида боксчилик лицензиясини олди. Бу ҳақда, MMA Fighting порталига таяниб, «ТАСС» хабар бермоқда.
«Конор ҳақиқатдан ҳам лицензия олди. Шу дамдан буён у Калифорнияда боксчи бўлди. Эндиликда Макгрегор ўзига муносиб рақиб топиши керак», – деди Калифорния атлетлари комиссияси ижрочи директори Энди Фостер.
Аввалроқ профессионал рингда мағлубиятга учрамаган ҳамда фаолиятини якунлаган АҚШлик боксчи кичик Флойд Мейвезер Конор Макгрегор билан бокс қоидаларига кўра жанг қилиш истаги борлиги ҳақида маълум қилган эди. Бунга жавобан ирландиялик жангчи Мейвезер билан бокс қоидаларига мувофиқ жанг ўтказиш учун 100 миллион доллар сўраганди.
Конор Макгрегор 13 ноябрь куни UFC’нинг енгил вазн тоифасида Эдди Альваресни мағлубиятга учратиб, икки вазн тоифасида UFC чемпиони бўлган илк жангчига айланган эди. Бунга қадар у 2015 йилнинг декабрь ойида Жозе Альдони нокаутга учратиб, ярим енгил вазн тоифасида UFC чемпионлик камарини ҳимоя қилганди.
Бироқ 27 ноябрь куни Конор Макгрегор Жозе Альдога қарши мажбурий жанг ўтказишдан бош тортгани учун ярим енгил вазн тоифасида жаҳон чемпиони унвонидан маҳрум этилди.
Маълумот учун, 28 ёшли Макгрегор фаолиятини 2008 йилда бошлаган. Шу вақтгача у 23 та жанг ўтказиб, 20 тасида (17 тасида нокаут билан) зафар қучган ва 3 тасида мағлубиятга учраган.
