«Реал» бош мураббийи Зайниддин Зидан ФИФА томонидан йилнинг энг яхши мураббийи бўлиш учун номзодлар рўйхатига киритилганига изоҳ берди.
«Ҳар куни ўқиб, ўрганиб, билимимни оширмоқдаман. Бироқ йилнинг энг яхши мураббийи бўлишга номзодлар орасига киритилишимга ҳали эрта деб ҳисоблайман. Кучли учликка киритилганимдан хурсандман. Аммо йилнинг энг яхши мураббийи бўлишга мендан ҳам муносиблар бор» - деди Зидан AS хабарида.
Зидан 2016 йил январь ойида «Реал» бош мураббийи қилиб тайинланган ва кейинчалик жамоа билан Чемпионлар лигаси ва УЕФА суперкубогида ғолиб чиққан эди.
Зидандан ташқари йилнинг энг яхши мураббийи бўлиш учун «Лестер» бош мураббийи Клаудио Раньери ва Португалия терма жамоаси устози Фернанду Сантуш номзоди ҳам кўрсатилган.
