Англия Премьер Лигасининг 34-тури доирасида “Манчестер Сити” сафарда “Бёрнли” устидан 1:0 ҳисобида ғалаба қозониб, муҳим уч очкони қўлга киритди. Ушбу учрашувда Ўзбекистон терма жамоаси ҳимоячиси Абдуқодир Ҳусанов “шаҳарликлар” асосий таркибида майдонга тушиб, тўлиқ 90 дақиқа ҳаракат қилди.
Ҳусанов ўйин давомида 93 марта тўпга тегиб, узатмаларда деярли хатога йўл қўймади. Ҳимоячи жами 81 та узатманинг 75 тасини аниқ амалга оширди (93 фоиз аниқлик). Айниқса, ҳимоячининг ўз ярим майдонида амалга оширган узатмалари деярли хатосиз бўлди — 98 фоиз аниқлик Sofascore портали Ҳусановнинг ҳаракатларини 7,7 балл билан баҳолади. Умуман олганда, Ҳусанов “Манчестер Сити” ҳимоя чизиғида ҳаракат қилган энг яхши футболчи бўлди. Жумладан, Матеус Нуньес ҳамда Марк Гехи 7,1 баҳога лойиқ кўрилган бўлса, Райан Аит-Нури 6,8 балл олди.
Абдуқодир Ҳусановнинг ҳимоядаги кўрсаткичлари қуйидагича кўриниш олди:
Тўпни олиб қўйиш: 1 (муваффақиятли);
Ҳаводаги курашлар: 4 тадан 4 тасида ғалаба;
Ердаги курашлар: 3 тадан 2 тасида ғалаба;
Тўпни узоқлаштириш: 5 марта;
Тўпни қайтариб олиш: 7 марта;
“Манчестер Сити” сафида гол муаллифи бўлган Эрлинг Ҳоланд 7,6 баллга лойиқ кўрилган бўлса, дарвоза дахлсизлигини сақлаган Жанлуижи Доннарумма 7,3 балл олди. Мезбонлар сафида эса ўз дарвозасидан битта тўп олиб чиққан дарвозабон Мартин Дубравка 9,5 балл билан учрашувнинг энг яхши футболчиси деб топилди.
