Angliya Premyer Ligasining 34-turi doirasida “Manchester Siti” safarda “Byornli” ustidan 1:0 hisobida g‘alaba qozonib, muhim uch ochkoni qo‘lga kiritdi. Ushbu uchrashuvda O‘zbekiston terma jamoasi himoyachisi Abduqodir Husanov “shaharliklar” asosiy tarkibida maydonga tushib, to‘liq 90 daqiqa harakat qildi.
Husanov o‘yin davomida 93 marta to‘pga tegib, uzatmalarda deyarli xatoga yo‘l qo‘ymadi. Himoyachi jami 81 ta uzatmaning 75 tasini aniq amalga oshirdi (93 foiz aniqlik). Ayniqsa, himoyachining o‘z yarim maydonida amalga oshirgan uzatmalari deyarli xatosiz bo‘ldi — 98 foiz aniqlik Sofascore portali Husanovning harakatlarini 7,7 ball bilan baholadi. Umuman olganda, Husanov “Manchester Siti” himoya chizig‘ida harakat qilgan eng yaxshi futbolchi bo‘ldi. Jumladan, Mateus Nunyes hamda Mark Gexi 7,1 bahoga loyiq ko‘rilgan bo‘lsa, Rayan Ait-Nuri 6,8 ball oldi.
Abduqodir Husanovning himoyadagi ko‘rsatkichlari quyidagicha ko‘rinish oldi:
To‘pni olib qo‘yish: 1 (muvaffaqiyatli);
Havodagi kurashlar: 4 tadan 4 tasida g‘alaba;
Yerdagi kurashlar: 3 tadan 2 tasida g‘alaba;
To‘pni uzoqlashtirish: 5 marta;
To‘pni qaytarib olish: 7 marta;
“Manchester Siti” safida gol muallifi bo‘lgan Erling Holand 7,6 ballga loyiq ko‘rilgan bo‘lsa, darvoza daxlsizligini saqlagan Janluiji Donnarumma 7,3 ball oldi. Mezbonlar safida esa o‘z darvozasidan bitta to‘p olib chiqqan darvozabon Martin Dubravka 9,5 ball bilan uchrashuvning eng yaxshi futbolchisi deb topildi.
