«Бенфика» бош мураббийи Жозе Моуриньо фаолиятида иккинчи бор Мадриднинг «Реал» клубини бошқариши мумкин.
Diario AS нашрининг хабарига кўра, португалиялик мутахассиснинг агенти Жорже Мендеш сўнгги соатларда Мадрид клуби раҳбарияти билан алоқага чиққан. Маълум қилинишича, агент ўз мижозининг хизматларини «қироллик клуби»га таклиф қилган ва Моуриньонинг «Бенфика» билан шартномасини бекор қилиш учун тўланиши керак бўлган товон пули миқдорини ҳам очиқлаган.
Айни дамда Мадрид клубида Альваро Арбелоанинг келажаги мавҳум бўлиб турибди ва клуб раҳбарияти янги мавсум учун тажрибали мураббий қидирувига тушган.
Эслатиб ўтамиз, Жозе Моуриньо 2010 йилдан 2013 йилгача «Реал»ни бошқарган. Унинг қўл остида мадридликлар Испания чемпионати, мамлакат Кубоги ва Суперкубогида зафар қучишган. ЕЧЛдаги энг яхши натижа эса кетма-кет уч мавсум давомида ярим финалгача етиб бориш бўлган.
