Бутунжаҳон бокс ассоциацияси (WBA) йўналишида ярим енгил вазнда жаҳон чемпионлигига собиқ даъвогар кичик Алехандро Гонсалес Мексиканинг Гвадалахара шаҳридаги уйи яқинида ўлдирилган ҳолда топилди. Бу ҳақда «ТАСС» хабар бермоқда.
23 ёшли боксчининг жасади 9 декабрь, жума куни автомобилда яна икки кишининг ўлиги билан бирга топилди. Улардан бири Гонсалеснинг бобоси эканлиги тахмин қилинмоқда. Улар қатл қилингани билдирилмоқда. Ҳозирда мазкур ҳодиса юзасидан текширув олиб борилмоқда.
Гонсалес фаолияти давомида 31 жанг ўтказган ва улардан 25 тасида ғалаба қозонганди. Унинг отаси ҳам ўз вақтида WBC ва IBA йўналишларида жаҳон чемпионлигини қўлга киритган профессионал боксчи эди.
