Ўзбекистонлик гимнастикачи Оксана Чусовитина Олимпия ўйинларида энг кўп иштирок этган спортчи сифатида Гиннеснинг Рекордлар китобига киритилди. Бу ҳақда спортчи ўзининг Instagram`даги саҳифасида хабар қилди.

Чусовитина 41 ёш ва 56 кунлигида Рио-де-Жанейродаги Олимпиада-2016 ўйинларида иштирок этиб, Олимпия ўйинларида кетма-кет етти маротаба қатнашган ҳолда тарихдаги энг ёши катта гимнастикачига айланганидан ташқари, рекорд соҳибаси ҳам бўлди.

«Мен учун бу янги босқич, ҳаётимдаги катта ҳодиса. Мен Ўзбекистондан Гиннеснинг Рекордлар китобига киритилганимдан жуда фахрдаман ва бахтиёрман, — дея Оксана Чусовитина „Газета.uz“ билан ўз таассуротларини бўлишди. — Ҳозирча Олимпиада-2020 ҳақида ўйлаётганим йўқ, айни пайтда барча хаёлим келгуси йил Монреалда ўтадиган жаҳон чемпионатига қаратилган. Олдиндан айтишим қийин, шунинг учун олдинга кичик қадамлар билан ҳаракат қиламан, кейин эса нима бўлишини кўрамиз».

«Ўзбекистон ва бутун дунёдаги барча мухлисларимга кўмаги ва ишончи учун миннатдорчилик билдиришни хоҳлар эдим, айнан улар мени янги марралар сари ундади ва олға интилишга туртки беришди», — дея қўшимча қилди гимнастикачи.

Оксана Чусовитина гимнастика тарихида етти маротаба кетма-кет (1992, 1996, 2000, 2004, 2008, 2012 ва 2016 йилларда) ёзги Олимпия ўйинларида иштирок этган ягона спортчи аёл ҳисобланади. У уч карра жаҳон, Европа ва Осиё ўйинлари чемпиони, жаҳон биринчиликларининг тўртта кумуш, тўрт бронза медалига ҳам сазовор бўлган.