"Барселона" ёзги трансфер ойнаси ёпилгунига қадар ҳимоя чизиғини кучайтириши мумкин.
"Кўк-анорранглилар" чап оёқда ўйнайдиган марказий ҳимоячи позициясига янги футболчи олиб келишни режалаштирмоқда. Журналист Жерар Ромеро маълумотига кўра, каталонияликлар "РБ Лейпциг" ҳимоячиси Кастелло Люкеба ва Лиссабоннинг "Спортинг" клуби вакили Гонсалу Инасиуни устувор номзодлар сифатида белгилаб олган. Инасиуга "Барселона" қизиқиш билдираётгани ва Люкеба ҳам рўйхатдан жой олгани бошқа манбаларда ҳам қайд этилмоқда.
Transfermarkt портали 23 ёшли Люкебанинг бозор қийматини 50 миллион еврога баҳоламоқда. 24 ёшли Инасиунинг қиймати эса 40 миллион еврони ташкил этади.
Бугун Ханс-Дитер Флик шогирдлари Ла Лиганинг янги мавсумидаги илк учрашувини ўтказади. "Барселона"нинг рақиби "Эльче" бўлади. Баҳс Тошкент вақти билан соат 00:30 да бошланиши режалаштирилган.
