Халқаро бобслей ва скелетон федерацияси (IBSF) 2017 йилнинг февраль ойида Россиянинг Сочи шаҳрида бўлиб ўтиши керак бўлган жаҳон чемпионатини бошқа шаҳарга кўчириш ҳақида маълум қилди, деб хабар бермоқда Meduza.
«IBSF Ижроия қўмитаси ушбу қийин даврда бундай турнирни Россияда ўтказмаслик тўғрироқ бўлишига қарор қилди», – дейилади IBSF хабарида.
Хабарда қайд этилишича, жаҳон чемпионати ўтказиладиган шаҳар номи кейинроқ эълон қилинади. IBSF’нинг эълонидан сўнг Россия бобслей федерацияси ушбу қарорни қабул қилишга мажбур бўлганини маълум қилгани таъкидланмоқда.
«Вужудга келган вазиятда IBSF спорт атрофида низоларнинг пайдо бўлиши ва турнирнинг оммавий бойкот қилиниши мумкинлигига юзма-юз келиб қолди. Айни вақтда яхши ечимлар йўқ ва ҳамкасбларимиз шундай қарорга келишга мажбур бўлди», – дейилади Россия бобслей федерацияси хабарида.
Бир неча кун аввал скелетон бўйича Латвия терма жамоаси Россиядаги жаҳон чемпионатига бойкот эълон қилган эди. Бутунжаҳон антидопинг агентлиги (WADA) мустақил комиссиясининг эълон қилинган иккинчи ҳисоботидан кейин Россия ҳукумати допинг тизимини қўллаб-қувватлаши ҳақидаги хабарлар пайдо бўлгач, Латвия термаси шундай қарорга келган.
Аввалроқ скелетон бўйича амалдаги жаҳон чемпиони Мартинс Дукурс ва мураббий Дайнис Дукурс Россиядаги жаҳон чемпионатини бойкот қилиши мумкинлиги айтилганди. АҚШ ва Жанубий Корея терма жамоаси аъзолари ҳамда британиялик Элизабет Ярнольд ҳам Сочидаги ЖЧга бормаслик ҳақида ўйлаётганди.
