Малайзиянинг Куала-Лумпур шаҳрида ўтказилаётган “Supermokh Cup 2016” турнири ҳал қилувчи палласига кирди.
Бугун, 17 декабрь куни “Бунёдкор”нинг ҳар иккала жамоаси ўз учрашувларини ўтказишди. 2002 йилда таваллуд топган футболчилардан иборат жамоамиз кеча Франциянинг ПСЖ футбол мактаби тарбияланувчиларини иродали тарзда мағлубиятга учратиб, ярим финалга йўлланма олганди. Сергей Чигодаев ва Акмал Рисқуллаев шогирдлари финалга чиқиш учун бугун Малайзия пумалари жамоаси билан куч синашишди. Қизиқарли ва муросасиз кечган баҳсда вакилларимиз 1:2 ҳисобида имкониятни бой бериб қўйишди. Жамоамизнинг ягона голини Диёрбек Раҳимқулов жарима зарбасидан киритди.
2004 йилда туғилган футболчиларимиз эса гуруҳ босқичидан муваффақиятли ўта олмаган саккизта жамоа билан кичик кубок учун кураш олиб бораётганди. Афсуски, Миркамол Қосимов ва Темур Бобохонов шогирдлари бугун Жанубий Кореянинг “Бюлнай” жамоасига ютқазиб қўйди – 0:2.
