Россия футбол иттифоқи (РФИ) ҳамда мамлакат бош вазири ўринбосари Виталий Муткога нисбатан расмий суриштирув ишлари олиб борилмаяпти. Бу ҳақда Халқаро футбол федерацияси (ФИФА) Ахлоқ қўмитаси матбуот хизмати «Р-Спорт»га маълум қилди.

«Қўмита суриштирув ишини бошлаганини тасдиқлай олмаймиз. Дастлабги терговдан сўнг бир нима аниқлансагина расмий суриштирув иши очилади. Айни вақтда ҳеч қандай расмий суриштирув йўқ эканини таъкидлаб ўтмоқчимиз», – дейилади ФИФА хабарида.

ФИФА томонидан Виталий Муткога нисбатан суриштирув иши бошлангани ҳақидаги хабар 18 декабрь куни пайдо бўлди. Daily Mail нашри далиллар топилган тақдирда Мутко футболга оид ҳар қандай фаолиятдан четлатилиши ҳамда ЖЧ–2018 эса бошқа мамлакатда бўлиб ўтиши мумкинлиги ҳақида маълум қилди.

Россияни футбол бўйича ЖЧ–2018 турниридан маҳрум қилишнинг «янги тўлқини» Бутунжаҳон антидопинг агентлиги (WADA) мустақил комиссияси раҳбари Ричард Маклареннинг 9 декабрь куни Лондонда эълон қилган ҳисоботидан кейин юзага келди. Ҳисоботда Россия ҳукумати допинг тизимини қўллаб-қувватлаши ҳақида сўз борган.

Кейинроқ Россия бош вазири Дмитрий Медведев бу ҳақиқатдан йироқ гаплар эканини ва ҳукуматда допинг тизими йўқ эканини айтганди.