ФИФА дунё терма жамоаларининг 2016 йилдаги сўнгги рейтинг жадвалини эълон қилди. Унга кўра, Ўзбекистон терма жамоаси йилни 62-ўринда якунлайдиган бўлди.

Аввалги ойдаги жадвал билан таққослаганда, терма жамоамиз ҳисобидаги очколар сони 5тага кўпайган, аммо жамоамиз ўз поғонасини ўзгартирмаган.

Ўзбекистон Осиё жамоалари орасида 6-ўринни эгаллаб турибди. Эрон бир поғона кўтарилган ҳолда (29-ўрин), ҳамон Осиёнинг энг яхши жамоаси бўлиб турибди. Жанубий Корея ва Япония терма жамоаси ўз ўринларини ўзгартиришмаган — 37 ва 45-ўринлар. Австралия бир ўрин кўтарилиб, 47-поғонани, Саудия Арабистони эса 2 қатор юқорилаганча 54-ўринни банд этган. ЖЧ-2018 саралашида Ўзбекистон билан бир гуруҳдан ўрин олган жамоалар қуйидаги поғоналарни эгаллаган: Хитой — 82-ўрин (+1), Қатар — 87-ўрин (+1), Сурия 96-ўрин (-1).

Умумий рейтингнинг юқори қисмида ҳеч қандай ўзгариш бўлмаган. Топ-10 қуйидагича кўриниш олган:
1. Аргентина — 1634 балл
2. Бразилия  — 1544
3. Германия — 1433
4. Чили  — 1404
5. Бельгия — 1368
6. Колумбия — 1345
7. Франция — 1305
8. Португалия — 1229
9. Уругвай — 1187
10. Испания — 1166

Рейтингининг тўлиқ кўриниши билан ФИФА расмий сайтида танишиб олишингиз мумкин.