Рио—2016 Олимпиадаси қаҳрамонларидан бири Фазлиддин Ғоибназаров спортда қўлга киритган мукофот пулларининг барчасини устози Аброр Турсунпўлатовга берганини қайд этиб ўтганди. Кейинроқ спортчи бу вазиятни «Дарё»га изоҳлаб берди.
Фазлиддин Ғоибназаровнинг қайд этишича, у спортдаги муваффақиятларида асосий ролни ўйнайдиган устозига тўлиқ ишонади ва жуда ҳурмат қилади.
«Аброр ака муваффақиятларимга жуда катта ҳисса қўшган инсон. Шу боисдан ҳам мукофотларимнинг ҳаммасига мен билан тенг ҳақли. Мен ҳар сафар қўлга киритган ютуғимни у кишига олиб бораман. Бунда уларнинг ҳиссалари катта эканини қайд этиб, раҳмат айтаман. Бироқ устозим пулни қандай бўлса, шундай қайтаради ёки менинг келажагим учун сарфлайди, оиламга кўмак беришга ҳаракат қилади, маслаҳатини аямайди. Уни эсдан чиқармаслигимнинг ўзидан қувонишини айтади» - деди Фазлиддин Ғоибназаров, Рио—2016 Олимпиадаси чемпиони.
Ғоибназаровнинг сўзларига кўра, у ва устозининг ўртасидаги муносабатлар жуда самимий. Улар бир-бирига тўлиқ ишонади.
Боксчи шогирдларнинг устозига бўлган чексиз ҳурматини қадрлашини қўшимча қилди.
