Тошкентда авиамоделлаштириш, пневматик қурол ва тўппончадан ўт отиш бўйича мусобақа бўлиб ўтди.
24−25 декабрь кунлари Тошкентда ўсмирлар ва ёшлар ўртасида техник ва амалий спорт турлари — авиамоделлаштириш, пневматик қурол ва тўппончадан ўт отиш бўйича мусобақа бўлиб ўтди, деб хабар қилди Ўзбекистон Мудофаага кўмаклашувчи «Ватанпарвар» ташкилоти «Газета.uz"га.
Мусобақанинг саралаш босқичларида 2000 нафардан зиёдроқ спортчи қатнашган бўлса, уларнинг 45 нафари хонада авиамоделлаштириш, 48 нафари кордда авиамоделлаштириш, 61 нафари пневматик қурол ва тўппончадан ўқ узиш бўйича финал босқичига етиб келди.
Авиамоделлаштириш бўйича мусобақада 16−18 ёшгача спортчилар орасида Шаҳбоз Бафоев (Бухоро вилояти), Муҳиддин Бобораҳимов (Тошкент) ва Сарварбек Бойларов (Наманган вилояти), 18−25 ёш тоифасида Алексей Бундин (Тошкент), Сардор Саид (Тошкент) ва Шерзод Шавкатжонов (Фарғона вилояти) ғолиб бўлди.
Хонада авиамоделлаштириш бўйича жамоалар ичида Тошкент вилояти биринчи, Бухоро иккинчи ва Самарқанд учинчи ўринни қўлга киритди. Кордда авиамоделлаштириш мусобақаларида Тошкент «олтик», Фарғона «кумуш» ва Андижон «бронза» медалига сазовор бўлди.
Пневматик қуролдан ўқ отиш бўйича Саидхон Сайфуддинов (Андижон вилояти) ва Олима Комилова (Хоразм вилояти), тўппончадан ўқ узишда эса II ўсмирлар Олимпиадаси ғолиби Владимир Свечников (Тошкент) ва Муслима Йўлдошева (Фарғона вилояти) олий ўринларни қўлга киритди.
Мусобақа доирасида мураббийлар ва мутахассислар иштирокида суҳбат ва мастер-класслар, Тошкентнинг диққатга созовор масканларига экскурсия ташкил этилди.
