Нўъмон Ҳасанов бошчилигидаги “Қўқон-1912” клуби Тошкентда иккинчи йиғинни ўтказяпти.
Жамоа сафида ўзгаришлар давом этмоқда. Таркибга бир қатор янги ўйинчилар келиб қўшилиш билан бирга жамоани тарк этаётган футболчилар ҳам йўқ эмас.
Хусусан, ўтган йили ўзининг ишончли ўйинлари билан жамоага ёрдам берган ўйинчилар – Абдуллох Олимов, Миржалол Қурбонов, Маъруф Зокиржонов ва Руслан Матниязов билан тузилган шартномалар якунига етгани боис, қолаверса, ушбу футболчиларга бошқа клублардан таклифлар тушгани сабабли ўзаро келишувга асосан янги битим имзоланмади. Бу футболчилар билан дўстона хайрлашилди.
Шунингдек, яна бир ёш футболчи Достон Турсуновга Бекободнинг “Металлург” клуби жиддий тарзда қизиқиш билдиргани боис, ушбу футболчи билан ҳам янги шартнома имзоланмади. Турсунов ҳам янги мавсумни бошқа жамоада ўтказадиган бўлди.
Фурсатдан фойдаланиб, “Қўқон-1912” футбол клуби ушбу футболчиларга жамоадаги фаолияти учун миннатдорчилик билдиради ва уларнинг кейинги фаолиятида омад тилаб қолади.
