Ўзбекистонлик ҳужумчи Фарҳод Тожиев яна Малайзиянинг "Т-Тим" клубига қайтди. Ҳамюртимиз клуб билан бир йиллик шартномага имзо чекди.

Фарҳод 2015 йилда ҳам бу жамоа сафида ўйнаган. "Т-Тим" ўша мавсумда Премьер-лигада ўйнаган бўлса, клуб ҳозир Суперлигага чиққан. Тожиев жамоаси сафида 15та гол уришга муваффақ бўлганди. Футболчимиз жиддий жароҳат олгани боис, "Т-Тим" билан шартномани бекор қилиб, Ўзбекистонга қайтганди. Тожиевларнинг кенжаси ўтган мавсумни "Олмалиқ" сафида ўтказди.

"Т-Тим" бош мураббийи Раҳмад Дармаван ўзбекистонлик ҳужумчининг жамоага қайтганидан хурсанд эканини таъкидлаб ўтди.

"У яна сафимизга қайтди. Бу биз учун яхши. Мен унинг имкониятларини яхши биламан. Фарҳод — яхши ҳужумчи", - дейди Дармаван.

Раҳмад, шунингдек, ўтган мавсумда жамоа сафида ўйнаган икки нафар легионер — Дилшод Шарофетдинов (Ўзбекистон) ва Абдулаий Юсуф Майга (Мали)ни ҳам сақлаб қолди. "Т-Тим" ҳозирда кўрикда бўлиб турган икки хорижлик футболчи — Шавкат Саломов (Ўзбекистон) ва Мамаду Самасса (Мали)дан бири билан шартнома имзолайди.