O‘zbekistonlik hujumchi Farhod Tojiyev yana Malayziyaning "T-Tim" klubiga qaytdi. Hamyurtimiz klub bilan bir yillik shartnomaga imzo chekdi.

Farhod 2015 yilda ham bu jamoa safida o‘ynagan. "T-Tim" o‘sha mavsumda Premyer-ligada o‘ynagan bo‘lsa, klub hozir Superligaga chiqqan. Tojiyev jamoasi safida 15ta gol urishga muvaffaq bo‘lgandi. Futbolchimiz jiddiy jarohat olgani bois, "T-Tim" bilan shartnomani bekor qilib, O‘zbekistonga qaytgandi. Tojiyevlarning kenjasi o‘tgan mavsumni "Olmaliq" safida o‘tkazdi.

"T-Tim" bosh murabbiyi Rahmad Darmavan o‘zbekistonlik hujumchining jamoaga qaytganidan xursand ekanini ta’kidlab o‘tdi.

"U yana safimizga qaytdi. Bu biz uchun yaxshi. Men uning imkoniyatlarini yaxshi bilaman. Farhod — yaxshi hujumchi", - deydi Darmavan.

Rahmad, shuningdek, o‘tgan mavsumda jamoa safida o‘ynagan ikki nafar legioner — Dilshod Sharofetdinov (O‘zbekiston) va Abdulaiy Yusuf Mayga (Mali)ni ham saqlab qoldi. "T-Tim" hozirda ko‘rikda bo‘lib turgan ikki xorijlik futbolchi — Shavkat Salomov (O‘zbekiston) va Mamadu Samassa (Mali)dan biri bilan shartnoma imzolaydi.