2016 йилги Осиё чемпионлар лигасининг ғолиби — «Чонбук Моторс» ўз унвонини ҳимоя қила олмайдиган бўлди. Осиё футбол конфедерацияси клубни мусобақадан четлатиш ҳақида қарор чиқарди.
Боиси, кореяликларнинг келишилган ўйинларда иштирок этгани исботланди. Аввалроқ «Чонбук» 2013 ва 2014 йилларда кореялик ҳакамларга пора берганлиги ҳақида маълумотлар тарқалганди.
«Чонбук» 70000 фунт стерлинг миқдорида жаримага тортилди. Шунингдек, жамоадан бир нечта очколар олиб ташлангани боис клуб Жанубий Корея чемпионлигидан маҳрум бўлди. «Сеул» Корея чемпионига айланди.
Клуб ОФКнинг қарори юзасидан апелляция бермоқчи.
2016 йилги Осиё чемпионлар лигасининг финалида «Чонбук» БААнинг «Ал-Айн» клубини иккита ўйин натижасига мағлуб этганди.
