«Олмалиқ» клуби Новосибирскнинг "Сибирь" жамоаси билан ўртоқлик учрашуви ўтказди.

Қизиқарли кечган баҳсда «Олмалиқ» футболчилари ғалаба нашидасини суришди.

Ўйиннинг дастлабки 25 дақиқасида рақиб фаолроқ кўринди. Секин-аста вазиятни тенглаштирган «Олмалиқ» аъзолари биринчи таймнинг сўнгги 5 дақиқасида икки гол уришга эришишди. Дастлаб 42-дақиқада Акбар Тўраев кучли зарба билан тўпни рақиб томон тепди. Ҳимоячилардан илдамроқ ҳаракат қилган Алтимурот Аннадурдиев бир ҳаракат билан тўпга югуриб чиққан рақиб посбонини ҳам алдаб ўтди ва тўпни бўш қолган дарвозага йўллади. Орадан кўп ўтмай ўнг қанотдан Алибобо Раҳматуллаев ошириб берган тўпни Дилшод Жўраев бир зарбада дарвоза тўрига жойлаб қўйди.

Иккинчи таймдаги ўзгаришлар «Олмалиқ» ўйинини янада кучайтирди. 55-дақиқада Дилшод Жўраев тўпни олдинги чизиққа етказиб берди. Бу вазиятда рақиб ҳимоячилари сунъий ўйиндан ташқари ҳолатни вужудга келтиришда хатоликка йўл қўйишди. Натижада Алибобо дарвозабон билан бирга-бир вазиятга чиқди. У ҳам посбонни алдаб ўтди ва бўш қолган дарвозани ишғол этди.

Ўртоқлик учрашуви. 22 январь

"Миракл" спорт мажмуаси. Анталия

"Олмалиқ" - "Сибирь" 3:0

Голлар: Алтимурот Аннадурдиев 42, Дилшод Жўраев 45, Алибобо Раҳматуллаев 55.

"Олмалиқ": Акбар Тўраев, Хуршид Мухторов, Шавкат Муллажонов, Владислав Касминин, Момчило Дулович, Ислом Иномов, Алтимурот Аннадурдиев, Дилшод Жўраев, Игорь Йелич, Алибобо Раҳматуллаев, Забиҳилло Ўринбоев.

Захирадан майдонга тушганлар: Раҳматилло Бердимуродов, Абдуқаҳҳор Ҳожиакбаров, Муҳаммад Исаев, Ғулом-Ҳайдар Ғуломов, Шоҳназар Норбеков, Хуршид Ходжаев, Мурод Ражабов, Виктор Клишин, Дониёр Усмонов, Азизбек Суюнов.

Ҳакам: Карим Каримов (Озарбайжон)