Футболчилар анча қизиққон касб эгалари ҳисобланади. Бироқ шундай футболчилар борки, улар бутун фаолияти мобайнида бирор марта қизил карточкага лойиқ кўрилмаган. Уларнинг орасида асосий вазифаси рақиб ҳужумлари ва ҳужумчиларини тўхтатиши керак бўлган ҳимоячиларнинг ҳам етарлича борлиги қувонарли. Goal нашри бундай футболчилар рўйхатини тузиб чиқди.
Филип Лам (Германия), “Штутгарт”, “Бавария”
“Бавария” сардори ушбу мавсум якунида футболчилик фаолиятига якун ясашини маълум қилди. Бундеслигаиннг икки жамоасида тўп сурган Филип Лам ҳали бирор марта ҳам қизил карточга лойиқ топилмаган. Ҳимоячилар орасида бундай ҳолат камдан-кам кузатилиши барчамиза аъён.
Раул Гонсалес (Испания), “Реал” Мадрид, “Шалке 04”, “Нью Йорк Космос”
“Реал” Мадрид афсонаси ҳам бутун фаолияти мобайнида қизил карточкага тортадиган ўйин қоидасини бузмаган.
Гари Линекер (Англия), “Лестер”, “Эвертон”, “Барселона”, “Тоттенхем”, “Нагоя Грампус”
Англия футболи афсоналаридан бири Гари Линекер ҳам бир неча клубларда ўйнаган бўлишига қарамай, ўзи ўйнаган жамоаларда ҳакамлар томонидан унга қизил карточка кўрсатилмаган.
Андрес Иньеста (Испания), “Барселона”
Каталониялик “афсунгар” ҳам ҳозиргача бундай “соврин”га лойиқ кўрилмаган.
Карим Бензема (Франция), “Лион”, “Реал” Мадрид
Франциялик ҳужумчи ҳам футболчилик фаолияти давомида ҳакамларнинг “ғазабига” дучор бўлмаган.
Жоао Моутиньо (Португалия), “Порту”, “Спортинг”, “Монако”
Португалиялик ярим ҳимоячи ҳам тартибли ўйин намойиш этиб келмоқда.
Мишел Платини (Франция), “Нанси”, “Сент-Этен”, «Ювентус»
Уч карра «Олтин тўп» соҳиби бутун футболчилик фаолияти мобайнида ҳакам томонидан қизил карточка билан сийланмаган.
Гаэтано Ширеа (Италия), “Аталанта”, “Ювентус”
Мудҳиш автоҳалокат сабабли ҳаётдан эрта кўз юмган 1982-йилги Мундиал чемпиони ҳам бирор марта қизил карточка билан “сийланмаган”.
Дамен Дафф (Ирландия), “Блекберн”, “Челси”, “Нюкасл”, “Фулхем”, “Мелбурн Сити”, “Шемрок Роверс”
Ирландиялик ярим ҳимоячи бир неча клубларда ўйнаганига қарамай, ҳеч бирида майдонни эрта тарк этмаган.
Аарон Ҳьюз (Шимолий Ирландия), “Нюкасл”, “Астон Вилла”, “Фулхем”, “Куинс Парк Рейнжерс”, “Брайтон”, “Мелбурн Сити”, “Керала Бластерс”, “Ҳартс”
Шимолий Ирландия термаси таркибида энг кўп ўйин ўтказган футболчилар орасида 2-ўринда бораётган Аарон Ҳюз ҳозирда ҳам футболчилик фаолиятини якунлагани йўқ. 37-ёшли ҳимоячи бирорта ҳам қизил карточка олмаган. Ҳимоячи учун ажойиб кўрсаткич!
Марко Боде (Германия), “Вердер”
Марко Боде ўз клубига содиқ қолган камёб футболчилардан бири. Фаолиятини “Вердер”га бағишлаган ҳужумкор ярим ҳимоячи ҳам вафодорлик, ҳам интизомлик рамзи десак муболоға бўлмайди.
Ян Поплухар (Чехословакия), “Слован” Братислава, “Руда Гвезда”, “Лион”, “Збровка Брно”, “Слован”
Бимбо лақабли чехославакиялик футболчи Ян Поплухар ҳам ҳимоячи бўлишига қарамасдан интизомли ўйин намойиш этган, бирор марта майдонни қизил карточка олиб тарк этмаган.
Дуду Жоржеску (Руминия), “Прогресул”, “ЧСМ Решитса”, “Динамо” Бухарест, “Бакеу”, “Глория”, “Флакера”, “Мусчелул”, “Униря”
Руминиялик ҳужумчи бутун фаолиятини Руминия жамоаларида ўтказган. 1975 ва 1977-йилларда Франc Футбол томонидан “Олтин бутса” билан тақдирланган ҳужумчи ҳисобида ҳеч қандай қизил карточка йўқ.
Жунейт Танман (Туркия), “Галатасарой”
“Галатасарой” таркибида умумий ҳисобда 425 учрашув ўтказган ҳимоячи клуб афсоналаридан бири ҳисобланади. Ушбу клубда 13 мавсум ўйнаган Жунейт Танман бирор марта қизил карточкага раво кўрилмаган.
Доминик Рошто (Франция), “Сент-Этен”, “ПСЖ”, “Тулуза”
“Яшил фаришта” лақабига эга Доминик Рошто Франция термаси билан 1984-йилги Европа чемпионатини ютиб олган. Ҳужумчи футбол майдонида анча интизомли ўйин намойиш этган ва қизил карточка билан “тақдирланмаган”.
Андрей Квашняк (Чехословакия), “Спарта” Прага
1962-йилги Мундиал вице-чемпиони Андрей Квашняк ҳам Ян Поплухар каби майдонда ўта интизомли ҳаракат қилган.
Яннос Иоанну (Кипр), “АПОЭЛ”
“АПОЭЛ” таркибида 1981-2000-йилларда фаолият олиб борган ҳужумчи бирор марта ҳам ҳакамлар томонидан қизил карточкага лойиқ кўрилмаган.
