Биатлон бўйича Жаҳон чемпионати мусобақаси ўз якунига етди.

Австриянинг Ҳохфилцен шаҳрида бўлиб ўтган баҳсларда Германия терма жамоаси биатлончилари 7 та олтин ҳамда 1 та кумуш медал билан умумжамоа ҳисобида биринчи ўринни эгаллади.

Жаҳон чемпионатининг сўнгги кунида, аёллар ўртасидаги масс-стартда Германия вакили Лаура Далмаер 12.5 км. масофани 33 дақиқа 13 сония ичида босиб ўтди ва энг яқин таъқибчиси америкалик Сюзан Данклидан 4.6 сония яхшироқ натижа билан биринчи ўринни эгаллади.

Учинчи ўрин ғолибга 20 сония ютказган Финландия термаси биатлончиси Кайся Макарайненга насиб этди. Шуни таъкидлаш керак, Далмаер учун ушбу олтин жаҳон чемпионатидаги учинчиси бўлди. Шунингдек спортчи ҳисобида 1 та кумуш медал ҳам мавжуд.

Турнирнинг сўнгги кунида, эркаклар ўртасидаги масс-старт ҳам бўлиб ўтди. 15 км. масофада ўтган баҳсларда ўқ отиш нуқтасида бирорта хатога йўл қўймаган Германия термаси аъзоси Симон Шемпп 35 дақиқа 38 сония кўрсатгич билан биринчи бўлди. Ундан 9 сониядан кейин, маррани Норвегия вакили Ёҳаннес Бё кесиб ўтди. Мезбон спортчи Симон Эдерга кумуш учун курашда бироз омад етишмади ва у учинчи ўрин билан кифояланди.