Biatlon bo‘yicha Jahon chempionati musobaqasi o‘z yakuniga yetdi.
Avstriyaning Hoxfilsen shahrida bo‘lib o‘tgan bahslarda Germaniya terma jamoasi biatlonchilari 7 ta oltin hamda 1 ta kumush medal bilan umumjamoa hisobida birinchi o‘rinni egalladi.
Jahon chempionatining so‘nggi kunida, ayollar o‘rtasidagi mass-startda Germaniya vakili Laura Dalmayer 12.5 km. masofani 33 daqiqa 13 soniya ichida bosib o‘tdi va eng yaqin ta’qibchisi amerikalik Syuzan Danklidan 4.6 soniya yaxshiroq natija bilan birinchi o‘rinni egalladi.
Uchinchi o‘rin g‘olibga 20 soniya yutkazgan Finlandiya termasi biatlonchisi Kaysya Makaraynenga nasib etdi. Shuni ta’kidlash kerak, Dalmayer uchun ushbu oltin jahon chempionatidagi uchinchisi bo‘ldi. Shuningdek sportchi hisobida 1 ta kumush medal ham mavjud.
Turnirning so‘nggi kunida, erkaklar o‘rtasidagi mass-start ham bo‘lib o‘tdi. 15 km. masofada o‘tgan bahslarda o‘q otish nuqtasida birorta xatoga yo‘l qo‘ymagan Germaniya termasi a’zosi Simon Shempp 35 daqiqa 38 soniya ko‘rsatgich bilan birinchi bo‘ldi. Undan 9 soniyadan keyin, marrani Norvegiya vakili Yohannes Byo kesib o‘tdi. Mezbon sportchi Simon Ederga kumush uchun kurashda biroz omad yetishmadi va u uchinchi o‘rin bilan kifoyalandi.
