Европа Чемпионлар лигасининг чорак финали йўлида бугун — 7 март куни иккита учрашув бўлиб ўтади. Неаполда «Наполи» Мадриднинг «Реал» клубини қабул қилса, «Бавария» футболчилари «Арсенал» билан ўйин учун Лондонга ташриф буюради.

Ҳар икки беллашув бир пайтда — Тошкент вақти билан 00:45 да старт олади. Шундан келиб чиқиб, Чемпионлар лигаси ўйинларини Ўзбекистон ҳудудида трансляция қилиш ҳуқуқини қўлга киритган UzReport жонли эфир учун улардан бирини танлаши керак бўлади.

Мазкур жамоаларнинг 15 февраль куни бўлиб ўтган дастлабки тўқнашуви вақтида UzReport «Бавария» — «Арсенал» ўйинига эътибор қаратганди. Жавоб ўйинида эса шунинг акси бўлади ва «Наполи» — «Реал Мадрид» учрашуви тўғридан-тўғри кўрсатилади.

Маълумот учун, «Реал» ўз майдонида «Наполи» устидан 3:1 ҳисобида зафар қучган бўлса, «Арcенал» Мюнхенда «Бавария»дан 1:5 ҳисобида енгилганди.