Кеча гул олиш учун дўконга кирдим. Бир зумда ўша ернинг ўзида сотувчилар ва харидорлар иштирокидаги Чемпионлар лигаси ўйинларига бағишланган ток-шоу бошланиб кетди. 8 март харакатлари билан югуриб юрган эркаклар сал футбол билан чалғидик. Ёши катта бир сотувчи отахон савол бердилар:
— Болам, сан яхшироқ биласан-ку, "Барселона" нима қиларкин бугун? (бу савол отахон "Барса"га эканлигини билдирарди)
— Ютади, менимча...
— Э, раҳмат, шунақа деб тур, буёғдагилар ўйин масаласи ҳал бўлган, деб бошимни қотириб ўтиришибти. Шуларга "болеть" қиламан...
Очиғи, ютади деб шунчаки жавоб ўйини натижасини назарда тутгандим, отахоннинг кайфиятини туширмаслик учун "ғалаба қозонгани билан, чиқа олмаса керак", деб гапимни давом эттирмадим. Яхшиям давом этмаган эканман.
Ўйин тугагач ўша диалог эсимга келди. Отахон ҳам мени эслаганлари аниқ :)
Бундай фантастик ўйинларнинг яна бир зўр тарафи - айнан учрашув олдидан ва тугагандан кейинги муҳокама ҳамда баҳслардир. "Барселона"га мухлислик қиладиган дўстларимни табриклайман! ПСЖнинг муаммоси эса - "Барселона"га қарши автобус услубидаги ҳимоявий услуб билан ўйинни бошлаганидир. Гап шундаки, "Барса" деярли ҳар ҳафта Испания Ла Лигасида "автобус"чиларга қарши ўйнайди ва бундай ётиб оладиган клубларни мағлуб этиш бўйича мутахассис бўлиб кетган. Эмери мураббийлик фаолиятининг катта қисмини Ла Лигада ўтказган ва унда Камп Ноудаги ўртача жамоалар синдроми сақланиб қолибди. Яъни майдонга тушмасдан руҳан мағлуб бўлиш.
Нима бўлганда ҳам тарихий ўйинга гувоҳ бўлдик, мазза қилдик!
Даврон ФАЙЗИЕВ,
"ЎзРепортТВ" телеканали шарҳловчиси
