Мисрлик таниқли археолог Заҳий Ҳавасс "Барселона" ҳужумчиси Лионель Месси шаънига айтган сўзлари бўйича раддия берди.

"Мен ҳеч қачон Мессини аҳмоқ демаганман. Бунақа нарса умуман бўлмаган. Менинг сўзларимни нотўғри таржима қилишибди. Гап шундаки, таржимон мен айтган гапларни охиригача таржима қилмаган.

Месси жаҳондаги энг муҳим инсонлардан бири эканини таъкидлаб ўтгандим. Бундан ташқари, унинг Мисрга ташрифи биз учун муҳим аҳамиятга эга эди. Бу ҳақда барча билади.

Шахсан ўзим Мессидан ҳайратланаман ва унинг ўйинларини ўтказиб юбормасдан кўраман. У футбол тарихидаги энг яхши футболчи эканига ишонаман. Мен уни яхши кўраман ва ҳурмат қиламан. Бир неча кун аввал тиззамни мураккаб операция қилдирганимга қарамай, мен у билан учрашувга ташриф буюрдим.

Яна бир марта такрорлайман, таржимон сўзлариним охиригача таржима қилиб бера олмади. Ахир Месси инглиз тилини билмайди. Мен Мессини хафа қилишим мумкин эмас, боиси унинг ўйинларидан ҳайратланаман", – деди археолог AS нашрига берган интервьюсида.

Эслатиб ўтамиз, Месси яқинда Мисрга ташриф буюриб, хайрия тадбирида иштирок этиб қайтганди.