"Машъал" - "Металлург" (1:0) ўйинидан кейин меҳмон жамоа бошлиғи Шавкат Саидов ўйин ҳақидаги фикрларини айтди.
"Бугун мухлислар жуда қизиқарли ва муросасиз ўйиннинг шоҳиди бўлишди. Биринчи турда мағлубиятга учраган иккала жамоа ҳам ўз мухлисларини хурсанд этиш учун фақатгина ғалабани кўзлаб майдонга чиққанди. Аммо бугун омад “Машъал” футболчилари томонида бўлди. Биринчи таймда мезбонлар устунлик қилишган бўлишса, иккинчи таймда ташаббус бизнинг томонимизда эди. Пенальтидан фойдалана олмадик. Ундан кейин ҳам камида учта қулай вазиятни кўкка совурдик. Бир сўз билан айтганда бугун мағлубиятга лойиқ эмасдик. Учрашув натижаси дурангга мос эди. “Машъал” жамоасини ғалаба билан табриклайман. Айниқса жамоа дарвозабони ўйин қаҳрамонига айланди. Учинчи тур ўйинимиз қолдирилган. Юзага келаётган танаффус эҳтимол жамоамизга ижобий роль ўйнар. Кейинги турлардан эътиборан бекободликлар кўчасида ҳам байрам бўлишига умид қиламиз" - деди Саидов.
