«Милан» футболчилари Италия чемпионатининг 28-тури доирасида «Ювентус»га қарши ўйиндан (1:2) кейин кийиниш хонасида тартибсизликларни юзага келтиришди.

Эслатиб ўтамиз, баҳснинг қўшиб берилган дақиқаларида белгиланган пенальти эвазига туринликлар ғалабани ўз томонларига оғдиришди.

Ҳакамнинг финал ҳуштаги янграган заҳоти «Милан» ҳужумчиси Карлос Бакка майдонни тарк этаётган бош ҳакам ёнига келиб, эҳтирос билан унга эътироз билдирди. Вазиятга «россонери» бош мураббийи Винченцо Монтелла аралашди ва Баккани бир четга итариб юборди.

Миланликлар кийиниш хонасига келишганидан кейин айрим футболчилар "Ювентус"нинг тарихий ғалабалари билан боғлиқ безакларга шикаст етказишди. Ҳаммадан ҳам кўра дарвозабон Жанлуижжи Доннарумма ғазабланди. У кийиниш хонаси деворларига оёқ билан тепди.