Европа футболида ўз ўрнига эга бўлган баъзи мураббийлар (кўпчилиги футболчилик фаолияти билан ҳам машҳур) фаолияти давомида ўз фарзандларига ҳам устозлик қилган. Goal нашри ана шундай мураббийлардан баъзиларини эслаб ўтди.

Зайниддин ва Энцо Зидан: Франциялик машҳур футболчи ва мураббий Зайниддин Зидан ўғли Энцога Испания Кубоги доирасида “Културал Леонеса”га қарши баҳсда омадини синаб кўриш учун имконият берди.

Мичел ва Адриан Гонсалес: Испаниялик мураббий «Реал»нинг ўринбосарларига мураббийлик қилган чоғида ўғли Адрианни “Хетафе”га қарши учрашувда майдонга туширган.

Йоҳан ва Ҳорди Круйфф: “Барселона” клуби афсоналаридан бири Йоҳан Круйфф ушбу жамоага мураббийлик қилган даврида ўғли Ҳордига ҳам футбол сир-асрорларини ўргатишига тўғри келган.

Чезаре ва Паоло Малдини: Машҳур ота-ўғил “Милан”да биргалик фаолият олиб боришган. 2001 йилда Чезаре Малдини ўғлига мураббийлик қилган.

Боб ва Майкл Бредли: Боб Бредли АҚШ терма жамоасини бошқарган пайтида Майклга футболдан сабоқ берган.

Владимир ва Владимир Вайс: Адаш Вайслар. Футболда бунақаси ҳам учраб туради. Катта Вайс кичик Вайсни Словакия термасига мураббийлик қилган чоғида шуғуллантириш имкониятига эга бўлган.

Ҳенрик ва Жордан Ларссон: Ҳенрик Ларссон катта футболдан кейин мурабийлик билан шуғулланаётганидан кўпчилик футбол мухлислари бехабар бўлса керак. Хусусан, “Ҳогаборгс”да ўғли Жорданга устозлик қилган.

Браян ва Найжел Клаф: “Ноттингем Форест”нинг афсонавий мураббийи 9 мавсум мобайнида ўғли Найжелга мураббийлик қилган.

Златко ва Нико Кранчар: 2004-2006-йилларда Хорватия терма жамоасига устозлик қилган Златко Кранчар ўғли Нико билан бирга ишлаган.

Абеди Пеле ва Андре Айю: «Нания» жамоасида устозлик қилган машҳур футболчи бу вақт ичида ўғли Андрени ҳам шуғуллантиришга муяссар бўлган.

Кристиан ва Йоан Гуркюфф: Гуркюффлар ҳозирда “Ренн” жамоасида биргаликда фаолият олиб бормоқда.

Ҳарри ва Жейми Реднапп: Ҳарри Реднапп «Борнмут»да уч мавсум ўғлига мураббийлик қилган.