Ўзбекистон миллий терма жамоасининг ЖЧ—2018 саралашидаги тақдирига яна 3 та ўйиндан сўнг ойдинлик киритилади.

12 июнь куни саралашнинг 8-тур учрашувлари бўлиб ўтади ва унда Самвел Бабаян жамоаси Эронга қарши саф тортади. Теҳрондаги ўйин Карлуш Кейруш жамоаси учун муҳим аҳамият касб этади. Боиси эронликлар Ўзбекистонни мағлуб этиб, Жаҳон чемпионати чиптасини нақд қилиши мумкин.

Шу томондан олиб қараганда, Эронга қарши ўйин осон ўтмайди. Томонларнинг Тошкентда бўлиб ўтган дастлабки ўйинида форслар 1:0 ҳисобида зафар қучган бўлиб, ўзбекистонлик футболчилар рақиб дарвозасига битта ҳам аниқ зарба бермаганди. Эрон эса ортда қолган 7 та тур давомида ўз дарвозасидан 1 та ҳам гол ўтказиб юбормади.

31 август куни 9-тур ўйинлари старт олади. Шу куни Ўзбекистон терма жамоаси сафарда Хитойга қарши саф тортади. Марчелло Липпи жамоасида 3-ўринни қўлга киритиш имконияти сақланиб тургани инобатга олинса, Чин ўлкасида кечадиган учрашувнинг ҳам анча оғир ўтишини тахмин қилиш мумкин. Томонларнинг Тошкентдаги ўйини Ўзбекистоннинг 2:0 ҳисобидаги ғалабаси билан якунига етганди.

5 сентябрь куни саралашнинг сўнгги ўйинлари ўтади. Шу куни Жанубий Корея терма жамоаси Тошкентда меҳмон бўлади. Сеулда Ўзбекистон ҳисобда олдинда бора туриб, якунда ўз дарвозасидан иккита гол ўтказиб юборганди.