Каталониянинг "Барcелона" жамоаси Ла лиганинг ушбу мавсумида энг сермаҳсул жамоа бўлиб турибди. Луис Энрике шогирдлари ортда қолган 28 ўйинда рақиблар дарвозаларига 81 та гол киритишди. Улар бу борада "Реал"дан 10 та кўп гол уришган.
Месси ва унинг шериклари ана шу голларнинг 57 тасини комбинациялар орқали киритишган. "Реал"да бу кўрсаткич 45 тани ташкил этмоқда. Демак, комбинацион ҳужумлар самарадорлиги бўйича "Барcелона" устунлик қилмоқда.
Қарши ҳужумлардан урилган голлар бобида устунлик Мадрид клуби томонида. Роналду ва унинг шериклари 5 марта, "Барcелона" эса 4 марта қарши ҳужумлардан унумли фойдаланишган.
Стандарт вазиятлардан урилган голлар бўйича ҳам "қироллик клуби" кичик устунликка эга. Тони Крооснинг бурчакдан ва жарима тўпларидан узатаётган тўплари "Реал"га катта фойда келтираётгани кўпчиликка сир эмас. Ушбу натижа бўйича ҳисоб 15: 14 Мадрид фойдасига!
"Реал"да Криштиану Роналду 6 та пеналтидан унумли фойдаланган бўлса, "Барcелона" сафида Лионел Месси 4 та ва Неймар 1 та 11 метрлик "нуқта"дан дарвозани ишғол этишган. Пеналтидан киритилган голлар бобида ҳам кичик устунлик Зидан шогирдлари тарафида.
Автоголлар ҳақида ҳам тўхталиб ўтадиган бўлсак, бу борада "Барcелона" рақибидан 1:0 ҳисобида олдинда.
