Франциялик ҳимоячи « Барселона »нинг ушбу мавсумдаги энг муҳим ўйинчиларидан бирига айланиб бўлди. Францияда бўлиб ўтган Евро-2016 баҳсларидан кейин каталонияликлар сафига келиб қўшилган Умтити ўсишда давом этмоқда. “Лион” тарбияланувчисининг “Барселона” сафидаги статистикаси ҳайратланарли тарзда.

Ҳимоячилар орасида энг кўп майдонга туширилаётган Умтити Жерар Пикедан кейин, Маскеранодан эса олдинда бормоқда. Қизиғи у клубнинг Ла Лигадаги омад тумори ҳисобланади. Йил бошида « Барселона » Франциялик ҳимоячиси билан ҳеч қачон ютқазмаётгани кўпчиликнинг эътиборини жалб қилганди. Чемпионат тугашига икки ой қолган вақтда ҳам жамоа Умтити майдонда бўлган беллашувларнинг бирортасида мағлубиятга учрамай келмоқда.

Умтити « Алавес » (1-2), « Селта » (3-4), « Депортиво » (1-2)лардан учралган мағлубиятларда иштирок этмаган. Бунга қўшимча тарзда, 12 дурангдан 6 тасида ҳам «Барселона» Умтитисиз ҳаракат қилган. Аксинча, у билан жамоа 16 ғалабага эришган. Фақатгина « ПСЖ »дан учралган қақшатқич мағлубиятгина Умтитининг кўрсаткичларини бузиб турибди. Бироқ, жавоб учрашувидаги « камбек »да Франциялик ҳимоячи « ўчи »ни олди.

Унинг муваффақиятлари Луис Энрикенинг 3-4-3 ўйин схемасида янада кучайди. Ҳимоянинг чап қанотидан жой олган Умтити Пике ва Маскеранолар билан бирга ўта ишончли ҳаракат қилмоқда. Унинг ҳаводаги курашларда анча ишончли ўйнаши клуб мухлисларининг эътиборидан жой олмоқда. Дастлабки мавсум Франциялик ҳимоячи учун барчаси ижобий кечмоқда.