Fransiyalik himoyachi « Barselona »ning ushbu mavsumdagi eng muhim o‘yinchilaridan biriga aylanib bo‘ldi. Fransiyada bo‘lib o‘tgan Yevro-2016 bahslaridan keyin kataloniyaliklar safiga kelib qo‘shilgan Umtiti o‘sishda davom etmoqda. “Lion” tarbiyalanuvchisining “Barselona” safidagi statistikasi hayratlanarli tarzda.

Himoyachilar orasida eng ko‘p maydonga tushirilayotgan Umtiti Jerar Pikedan keyin, Maskeranodan esa oldinda bormoqda. Qizig‘i u klubning La Ligadagi omad tumori hisoblanadi. Yil boshida « Barselona » Fransiyalik himoyachisi bilan hech qachon yutqazmayotgani ko‘pchilikning e’tiborini jalb qilgandi. Chempionat tugashiga ikki oy qolgan vaqtda ham jamoa Umtiti maydonda bo‘lgan bellashuvlarning birortasida mag‘lubiyatga uchramay kelmoqda.

Umtiti « Alaves » (1-2), « Selta » (3-4), « Deportivo » (1-2)lardan uchralgan mag‘lubiyatlarda ishtirok etmagan. Bunga qo‘shimcha tarzda, 12 durangdan 6 tasida ham «Barselona» Umtitisiz harakat qilgan. Aksincha, u bilan jamoa 16 g‘alabaga erishgan. Faqatgina « PSJ »dan uchralgan qaqshatqich mag‘lubiyatgina Umtitining ko‘rsatkichlarini buzib turibdi. Biroq, javob uchrashuvidagi « kambek »da Fransiyalik himoyachi « o‘chi »ni oldi.

Uning muvaffaqiyatlari Luis Enrikening 3-4-3 o‘yin sxemasida yanada kuchaydi. Himoyaning chap qanotidan joy olgan Umtiti Pike va Maskeranolar bilan birga o‘ta ishonchli harakat qilmoqda. Uning havodagi kurashlarda ancha ishonchli o‘ynashi klub muxlislarining e’tiboridan joy olmoqda. Dastlabki mavsum Fransiyalik himoyachi uchun barchasi ijobiy kechmoqda.