«Барселона» ҳужумчиси Неймар «Реал»га қарши ўйинни ўтказиб юборади.

У Испания чемпионатининг 31-туридан ўрин олган «Малага» (0:2) клубига қарши ўйиндаги қилиғи учун 3та ўйинга дисквалификация қилинди. Бу ҳақда Ла Лига расмий сайти эълон қилди.

Натижада Неймар «Реал Сосьедад» (15 апрель), «Реал» (23 апрель) ва «Осасуна»га (26 апрель) қарши ўйинларни ўтказиб юборадиган бўлди.

Эслатиб ўтамиз, Неймар «Малага»га қарши беллашувнинг 27-дақиқасида, бутсасини боғлаш баҳонасида вақт чўзгани учун огоҳлантирилди. 65-дақиқада эса тўпга етолмагач, рақибига нисбатан қўпол ўйнаб, майдондан четлатилди. Футболчи майдондан чиқиб кета туриб, тўртинчи ҳакамга намойишкорона киноя билан қарсак чалди ва унинг бу ҳаракати ҳакамни ҳақоратлаш сифатида баҳоланди.