«Barselona» hujumchisi Neymar «Real»ga qarshi o‘yinni o‘tkazib yuboradi.

U Ispaniya chempionatining 31-turidan o‘rin olgan «Malaga» (0:2) klubiga qarshi o‘yindagi qilig‘i uchun 3ta o‘yinga diskvalifikasiya qilindi. Bu haqda La Liga rasmiy sayti e’lon qildi.

Natijada Neymar «Real Sosyedad» (15 aprel), «Real» (23 aprel) va «Osasuna»ga (26 aprel) qarshi o‘yinlarni o‘tkazib yuboradigan bo‘ldi.

Eslatib o‘tamiz, Neymar «Malaga»ga qarshi bellashuvning 27-daqiqasida, butsasini bog‘lash bahonasida vaqt cho‘zgani uchun ogohlantirildi. 65-daqiqada esa to‘pga yetolmagach, raqibiga nisbatan qo‘pol o‘ynab, maydondan chetlatildi. Futbolchi maydondan chiqib keta turib, to‘rtinchi hakamga namoyishkorona kinoya bilan qarsak chaldi va uning bu harakati hakamni haqoratlash sifatida baholandi.