«Реал» бош мураббийи Зайниддин Зидан мухлисларнинг хоҳиш-истакларини инобатга олмоқчи эмас.

Примеранинг 34-турида «Депортиво»га (6:2) қарши ёрқин ўйин намойиш этганига қарамай, мутахассис захира футболчиларига таянмайди ва Бэйл – Бензема – Роналду (BBC) учлигидан воз кечмайди, деб хабар бермоқда Marca.

Испания матбуоти бу ўйинда Иско, Хамес Родригес, Марко Асенсио, Лукас Васкес, Альваро Мората ва Матео Ковачичнинг ўйинига юқори баҳо берди. Мухлислар ҳам BBC учлигига эмас, айнан шу футболчиларга кўпроқ имконият берилишини талаб қилмоқда. Аммо Зидан мавсумнинг энг муҳим ўйинларида таваккал қилмоқчи эмас ва юлдузли учлигини дастлабки дақиқалардан майдонга туширишда давом этади.