Бугун тунда биз иккинчи ярим финалнинг илк ўйинини томоша қиламиз.
“Реал” “Атлетико”ни Роналду ёрдами билан йирик ҳисобда енгди ва финалга чиқиш учун катта қадам ташлади. Бугун эса нуфузли турнирнинг иккинчи ярим финалини кўрамиз. “Монако” ўз уйида “Ювентус”ни қабул қилади. Икки йил муқаддам туринликлар “Монако”ни Чемпионлар Лигасидан чиқариб юборишган ва эҳтимол билан бу ҳол такрорланиши мумкин.
Европанинг энг уюшган ва тартибли жамоаси ёрқин ва ҳужумкор жамоага қарши. Кўпчилик “Юве”ни сўзсиз фаворит деб ҳисоблашмоқда, аммо айтиб ўтиш лозимки уларни осонгина сайр кутиб тургани йўқ. “Монако” ҳеч қандай босим сезмаябди ва финалда ўйнаш учун бор кучини кўрсатади.
Ўтган босқичда туринликлар “Барселона”ни енган бўлса, Буффон МНС триосидан тўп ўтказмади. “Монако” эса бу йўлда “Боруссия”ни ортда қолдириб 6 та тўп киритган. Шу каби “Сити”га ҳам 6 та гол киритишган эди. “Ювентус” умуман бошқа фалсафага эга ва ҳимоя чизиғи жуда мустаҳкам. Аллегри жамоаси сифатли ва самарали ҳимояланишни билишади. Таркибида Мбаппе, Фалькао, Бернарду Сильва ва бошқа қувноқ таркибга эга “Монако” шу ҳимояни синовдан ўтказади.
Ўйин 23:45 да старт олади. Бош ҳакам Антонио Матеу Лаос.