Тошкентнинг «Локомотив» футбол клуби Осиё Чемпионлар лигаси гуруҳ босқичининг сўнгги турида «Ал-Аҳли» меҳмони бўлиб, 0:4 ҳисобида мағлуб бўлди ва халқаро майдон билан хайрлашди.

Учрашувдан кейин БААда фаолият олиб борадиган ўзбекистонлик футбол мутахассиси Алишер Никимбаев «Локомотив» аслида қандай клубга имкониятни бой бергани борасида фикр билдирди.

Никимбаевнинг Twitter саҳифасида қайд этишича, БАА чемпионатида мавсум якунига етай деб қолди. Бу эса футболчиларда чарчоқ аломатларини кўрсатиши мумкин.

Клуб мамлакат чемпионлигини қўлга кирита олмай, 3-ўринда юргани учун ҳам ички муҳит у қадар яхши эмас, аниқроғи, тушкунлик ҳолати ҳукмрон.

Шунингдек, «Ал-Аҳли» раҳбариятининг футболчилар олдида қарздорлиги мавжуд. Бу қарздорлик ўтган йилги мавсумдан буён давом этиб келмоқда. Шунга қарамай, Ўзбекистоннинг бугунги кундаги энг яхши жамоаси «Ал-Аҳли»дан йирик мағлубият қабул қилиб олди.

Маълумот учун, томонларнинг Тошкентда бўлиб ўтган биринчи ўйинида «темирйўлчилар» 2:0 ҳисобида зафар қучганди. Аммо қўлга киритилган жами 5 очко навбатдаги босқич учун камлик қилди ва «Локомотив» гуруҳ босқичини сўнгги ўринда якунлади.