Таиландда давом этаётган футзал бўйича ёшлар (U20) ўртасидаги Осиё чемпионатида эртага чорак финал ўйинлари бўлиб ўтади. Ўзбекистон терма жамоаси бу босқичда Мўғулистонга қарши баҳс олиб боради.

Хосе Мария Мендез шогирдлари "С" гуруҳида биринчи ўринни қўлга киритишди. Жамоамиз тўплар нисбатига кўра Ливанни ортда қолдиришга муваффақ бўлди. Терма жамоамиз футзалчиси Акбар Усмонов 7та гол уриб, мусобақа тўпурарлиги учун асосий даъвогарлардан бири бўлиб турибди.

Мўғулистон эса "D" гуруҳида БААни ортда қолдирган ҳолда 2-ўринни банд этди. Мўғуллар 4та ўйиннинг 2тасида ғалаба қозонишди ҳамда биттадан дуранг ва мағлубият қайд этишди. Эрден-Очир Сандагдорж шогирдлари чорак финалда Ўзбекистонга қарши ўйинда ғалаба қозониш ҳақида ўйлаётганига шубҳа йўқ.

Ўзбекистон — "C" гуруҳи ғолиби
3 ғалаба, 1 дуранг, 10 очко
Урилган голлар: 21
Ўтказилган голлар: 8
Тўпурар футзалчи: Акбар Усмонов (7)

Хосе Мария Мендез (Ўзбекистон терма жамоаси бош мураббийи):
"Мусобақа бошлангунга қадар Мўғилистон ҳақида маълумотга эга эмасдик. Уларнинг ўйинларини кўриб чиққанимиздан кейин билдикки, рақиб жамоа сафида иқтидорли ўйинчилар бор. Уларнинг Хитойга қарши баҳси яхши чиқди.

Биз ўз ўйинимизни ташкил қилишда бир ўйинчига боғланиб қолмаймиз. Акбар Усмонов 7та гол урган бўлса-да, биз бир жамоа сифатида ҳаракат қиламиз. Ярим финалга чиқиш учун қўлимиздан келган барча ишни қиламиз. Ўзбекистон ва Мўғулистон ғалаба қозониш учун тенг имкониятларга эга. Ғалаба қозониш учун ўз режамизни амалга оширишга ҳаракат қиламиз".

Мўғулистон — "D" гуруҳида 2-ўрин
2 ғалаба, 1 дуранг, 1 мағлубият, 7 очко
Урилган голлар: 10
Ўтказилган голлар: 12
Тўпурар футзалчи: Алтансух Темууджин (4)

Эрден-Очир Сандагдорж (Мўғулистон терма жамоаси бош мураббийи):
«Мураккаб бўлган "D" гуруҳида иштирок этдик. Эрон, БАА ва Хитойга қарши ўйинларда иштирок этиб, чорак финалга чиқишни муваффақ бўлдик. Ўз мамлакатимиз учун катта ютуққа эришиш йўлида ҳаракатни давом эттирамиз. Биз кучли учликка киришни мақсад қилганмиз».