Ўзбекистон Кубоги доирасидаги "Нефтчи"-"Навбахор" (1:0) баҳсидан сўнг, фарғоналиклар бош мураббийи Андрей Фёдоров ўз фикрлари билан ўртоқлашди.

«Бугун режаларимизни тўлиқ амалга оширдик деб айта олмайман, чунки меҳмонлардаги четлатиш туфайли, улар асосий эьтиборини ҳимояга қаратгани боис, ҳужумларимиз бироз самарасиз кўриниш олди. Голли вазиятларни кўпроқ яратган бўлсак-да, уларни ниҳоясига етказишда совуққонлик ва тажовузкорлик етишмади.

Умумий қилиб айтадиган бўлсам, бугунги ўйин ва натижадан қониқдим. Лекин, жавоб учрашувини ҳисобга олсак, бугун кўпроқ гол уриш тарафдори эдим.

Легионерлар? Луцевич жароҳатдан кейин аста-секин тикланмоқда. Концевойга келсак, унда иқлимимизга мослашиш жараёни қийин ўтмоқда. Бундай иқлимда ўйнаб кетишга тайёр эмаслиги билинмоқда.

Чемпионатми ёки кубок? Ҳар бир ўйин биз учун муҳим саналади. Бу, Кубок ўйини бўладими ёки чемпионатми, аҳамияти йўқ. Чемпионлар лигасига чиқиш кубокни эгаллаш орқали осонроқ. Лекин, буни ҳар бир рақибимиз жуда яхши ҳис этади» - деди Фёдоров.