Ўзбекистон терма жамоаси ва «Локомотив» клубининг собиқ бош мураббийи Вадим Абрамов «Нефтчи» клубида иш бошлаши мумкин.

Мутахассис Ўзбекистон кубоги нимчоракфиналидан ўрин олган «Навбаҳор» - «Нефтчи» (2:1) баҳсига ташриф буюриб, жамоа раҳбарияти билан бирга ўйинни томоша қилган.

Абрамовнинг «Нефтчи»га тайинланиши ҳақида фарғоналиклар устози Андрей Фёдоров ҳеч нарса билмаслигини айтди. Хусусан у, ўйиндан кейинги матбуот анжуманида: «Бош мураббийни алмашиши мумкинлиги ҳақидаги гап-сўзлар миш-мишдан ўзга нарса эмас. Барчасини вақт кўрсатади. Ҳар бир ёзилган маълумот ҳам ҳақиқат бўлавермайди. Вадим Абрамовнинг жамоада иш бошлаши ҳақида ҳеч қандай маълумотга эга эмасман. Ҳозирча ўз ишимни давом эттираман. Нима бўлишини эса вақт кўрсатади» - деди.

Вадим Абрамов 1991-1992 йилларда «Нефтчи» клубида бош мураббий ёрдамчиси бўлиб ишлаган эди. Ҳозирча, унинг сўнгги иш жойи Тошкентнинг «Локомотив»и бўлиб қолмоқда (2014-2015).