O‘zbekiston terma jamoasi va «Lokomotiv» klubining sobiq bosh murabbiyi Vadim Abramov «Neftchi» klubida ish boshlashi mumkin.
Mutaxassis O‘zbekiston kubogi nimchorakfinalidan o‘rin olgan «Navbahor» - «Neftchi» (2:1) bahsiga tashrif buyurib, jamoa rahbariyati bilan birga o‘yinni tomosha qilgan.
Abramovning «Neftchi»ga tayinlanishi haqida farg‘onaliklar ustozi Andrey Fyodorov hech narsa bilmasligini aytdi. Xususan u, o‘yindan keyingi matbuot anjumanida: «Bosh murabbiyni almashishi mumkinligi haqidagi gap-so‘zlar mish-mishdan o‘zga narsa emas. Barchasini vaqt ko‘rsatadi. Har bir yozilgan ma’lumot ham haqiqat bo‘lavermaydi. Vadim Abramovning jamoada ish boshlashi haqida hech qanday ma’lumotga ega emasman. Hozircha o‘z ishimni davom ettiraman. Nima bo‘lishini esa vaqt ko‘rsatadi» - dedi.
Vadim Abramov 1991-1992 yillarda «Neftchi» klubida bosh murabbiy yordamchisi bo‘lib ishlagan edi. Hozircha, uning so‘nggi ish joyi Toshkentning «Lokomotiv»i bo‘lib qolmoqda (2014-2015).
